Успешна филантропска акуција за „АНГЕЛИТЕ“ во Гостивар

Аукцијата на уметнички слики и фотографии создадени од децата со посебни потреби во Гостивар помина успешно. Настанот се одржа вчеравечер во вид на тивка аукција и со продажбата на изложените дела беа собрани скоро 200 илјади денари.

Активноста ја организираше Здружението „Заедно можеме“.

„Ова е многу емотивна вечер за сите нас, особено за дечињата кои ние ги нарекуваме симболично „ангели“. Горди сме што аукцијата помина успешно и нивните дела ќе се најдат како украс во нечии домови и канцеларии, да го разубават просторот. Гостивар уште еднаш потврди дека е град на солидарноста, заедништвото и хуманоста. Од срце им благодарам на сите што учествуваа во овие активности“, рече Шпенди Салија, претседател на „Заедно можеме“

Собраните средства од продажбата на делата ќе бидат наменети за потребите на децата со попречености и идни активности на здружението.

Инаку, сликите и фотографиите децата ги создаваа претходно на работилници, под менторство на уметници во соработка со здружението Силиндарт и фотографот Осман Демири.

фото:фејсбук/Шпенди Салија