Утре во Гостивар традиционален велигденски концерт на ГАКУД „Браќа Ѓиноски“

Градското аматерско културно уметничко друштво „Браќа Ѓиноски“ од Гостивар на Велики четврток традиционално ќе одржи велигденски концерт со богата програма на народни ора и песни. Настанот е во организација на националната установа Центар за култура “АСНОМ” со поддршка на Министерството за култура.

„На целовечерниот концерт на ГАКУД „Браќа Ѓиноски” ќе се претстави фолклорната секција со сплетовите „Тресеница”, „Водарки”, „Повардарие”, ќе има оркестарски изведби на македонски народни ора, како и изведби на вокалните солисти Бојан Илиески, Мирослав Крстески и Јовица Николоски.“, информира кореографот Предраг Ристески.

Концертот во големата сала на Центарот за култура почнува во 19 часот, а влезот е слободен.

Ковид пандемијата изминатите две години нанесе голем удар врз опстојувањето на културно-уметничките друштва, но од ГАКУД Браќа Ѓиноски“ не се откажуваа од својата работа и останаа верни на мисијата и традицијата.

Почетоците на гостиварското културно уметничко друштво датираат од 1950 година. Група млади гостиварци се собрале да ги продолжат традициите на претходно постоечко друштво познато под името „Шивачки“. Со тек на времето, се равивало и го зголемувало членството. Друштвото зад себе има бројни концерти и настапи на фестивали во земјава и странство. Најголемиот меѓународен успех го постигнало на фестивал во Турција во 1985 година, каде во конкуренција на над 40 друштва од цел свет гостиварци го освоиле првото место.