Утревечер промоција на збирка поезија од младата гостиварка Емилија Србиноска

„Бесконечноста до тронот“ е насловот на збирката поезија, со која младата гостиварка Емилија Србиноска дебитира на книжевната сцена. Промоцијата на книгата ќе се одржи утревечер (24 јуни) во Центарот за култура „АСНОМ“ во Гостивар, со почеток во 19.30 часот.

Збирката содржи дваесет песни, а како главен мотив во стиховите се јавува љубовта.

„Песните се напишани во богат наративен стил и содржат приказна, што најчесто обработува некој љубовен настан, реплика или размисла на авторот за животот и љубовта во него. Србиноска има „агресивен“ поетски пристап кон субјектот, музата, кој воедно е причината и последицата на настанувањето на песната, врзувајќи ги времињата на минато и сегашност во кохерентна врска.“, пишува за поетската збирка, рецензентот Никола Илијовски.

Книгата е во издание на Здружението за книжевен равој Вавилон од Битола, кое на младата поетеса за ова дело и` додели Признание за афирмација на македонскиот јазик и литература.

Емилија Србиноска е родена во 2000-та година во Гостивар. Годинава заврши средно економско училиште, а од наесен продолжува со високо образование. Член е на гостиварскиот Клуб на млади поети.