Утрово починал велосипедист кој вчера бил удрен од автомобил во Гостивар

Утрово околу 6 часот на скопските клиники починал седумдесет и тригодишен жител на гостиварско Чајле, кој вчера попладне учествувал во сообраќајна несреќа во Гостивар. Врз неговото тело ќе се врши обдукција, по наредба на Јавен обвинител за да се утврди точната причина за смртта.

Според информациите од МВР несреќата се случила на ул„Гоце Делчев“ и во неа учествувале автомобил „фиат темпра“ што го управувал 66 годишен гостиварец и велосипедистот од Чајле. По несреќата, велосипедистот бил пренесен во гостиварската болница каде му биле констатирани лесни телесни повреди, но поради тоа што не се чувствувал добро бил задржан на понатамошно испитување. По извесно време тој паднал во безсознание и бил префрлен во Скопје, каде утрово им подлегнал на повредите.

Известен е Јавен обвинител и се преземаат мерки за расветлување на причините и околностите, соопштува полицијата.