Вакцинацијата во Здравствениот дом во Гостивар се спроведува редовно

Вакцините се една од најуспешните и најекономични здравствени мерки во светот, а имунизацијата е неопходна за да се спречат болести и да се заштити животот. Ваква е пораката од медицинските работници по повод Европската недела на имунизација, која годинава се одбележува од 20 до 26 април.

И во време на пандемија на коронавирус, вакцинацијата според редовниот календар се одвива непречено, велат од службата за вакцинирање на Здравствениот дом во Гостивар. Од лани, за бебињата задолжителни се нови две вакцини, објаснува докторката Адријана Бака.

„Од 1 јули 2019 во редовниот календар се воведени две нови вакцини. Вакцина против рота вирусот се дава во три дози, првата доза на два месеци, втората на четиримесечна возраст на детето и третата доза на шест месеци. И пневмококната вакцина, која исто така се дава на три дози и ги заштитува децата против респираторни инфекции. Се прима на два и четири месеци и ревакцинација на едногодишна возраст. Ја користам приликата, да нагласам дека вакцините штитат против заразни болести и апелираме до родителите редовно да ги носат децата на вакцинација, да ги заштитат децата“, рече д-р Бака.

По епидемијата на морбили во земјава минатата година, кај родителите веќе нема толку голем отпор кон МРП вакцината. Опфатот на деца со оваа вакцина која штити од морбили, рубеола и паротит на гостиварското подрачје сега е задоволителна, оценуваат од службата.

Поради вонредната состојба и согласно препораките да нема групирање на населението, годинава за Неделата на имунизација ќе изостанат вообичаените промотивни настани, кампањи и едукативни предавања. Во службите за вакцинација со цел да се избегне истовремено присуство на голем број лица, се прави распоред и вакцинацијата се спроведува со претходна покана на децата и со закажани термини.