Вакциналниот пункт во Гостивар ќе работи и во сабота, а од понеделник во две смени

Поради актуелната ситуација со ширење на големата кашлица (пертусис), Комисијата за заразни болести, меѓу другото препорача службите за вакцинација да работат со засилен интензитет во две смени и во сабота во една смена, со цел овозможување побрза вакцинација на пропуштените деца како противепидемиска мерка. Со ова се очекува да се зголеми опфатот со вакцината ДиТеПер (дифтерија, тетанус, пертусис).

Согласно препораките, вакциналиот пункт во Гостивар ќе биде отворен утре (сабота), а од понеделник ќе функционираат две смени.

„Апелираме родителите да ги донесат децата кои ги пропуштиле дозите од редовната имунизација, да ја примат вакцината. Повторно потсетуваме дека вакцинацијата е најдобриот начин на заштита од заразните болести и не треба да се избегнува“, рече д-р Дафина Богданоска од службата за вакцинирање во Здравствениот дом Гостивар.

Комбинирана вакцина ДиТеПер е предвидена во редовниот календар за имунизација.  Опфатот со вакцината во Македонија е под препорачаниот од 95%, неопходен за колективен имунитет.

Поради пораст на заразени со пертусис Комисијата препорача: Забрана за прием и престој во детска градинка на невакцинирани или некомплетно вакцинирани деца, согласно возраста во Календарот за имунизација и дијагностицираните лица со голема кашлица, да се изолираат во домашни услови најмалку 5 дена од започнување на препорачаната антибиотска терапија.