Велигден 2022 во Гостивар: Сплотени со радост во срцата, Христос Воскресе-Навистина Воскресе!

По две години, големиот христијански празник Велигден православните верници го празнуваат без пандемиски ограничувања и мерки. Во Гостивар достоинствено и масовно, се дочека веста за Христовото воскресение на прославата во соборниот храм „Пресвета Богородица“ во центарот на градот, а исполнето беше и централното градско подрачје. Според обичаите и традициите, на објавувањето на веста за Христовото воскресение и претходеше трикратниот опход околу црквата со пеење на Воскресение Христе Твое Спасе.

На полноќ се означи Велигден, празникот кога Исус станал од мртвите и ја докажал својата божествена моќ. Граѓаните си честитаа како што налагаат обичаите, со „Христос Воскресна-Навистина Воскресна“ и традиционално се кршеа со велигденските јајца. Одбележувањето на празникот продолжи со утрена и литургија на Свети Јован Златоуст.

Велигден се слави како празник над празниците, победа на животот над смртта.  Црвените велигденски јајца го симболизираат повторно раѓање. Се верува дека тврдата лушпа на јајцето го претставува гробот на Исус, а кршењето на јајцата – воскреснувањето од мртвите. Палењето на свеќите пак е симбол на распространувањето на Исусовата светлина, која никогаш не гасне. По обичај свеќата се носи дома и со неа се пали кандилото.

Богослужбите во црквата продолжуваат и во наредните денови од велигденските празнувања.