Култура

Велигденски концерт на „Браќа Ѓиноски“ во Гостивар по 25-ти пат

Објавено

пред 6 години

на

05/04/2018

Од

Gostivarpress.mk

Градското аматерско културно уметничко друштво „Браќа Ѓиноски“ од Гостивар уште еднаш докажа дека е достоен чувар на македонското фолклорно творештво и играорната традиција. Салата во Центарот за култура „АСНОМ“ за денешниот Велигденски концерт беше преполна, а публиката уживаше во шеесетминутната празнична програма. „Задоволни сме како помина концертот. Беа изведени ората Повардарие, Тресеница, Беранче и Водарки, а успешен настап имаа и пејачите Перо Пандиловски, Ангела Фичуроска и Кристина Јовановска.“, изјави кореографот Предраг Ристески.

Со Велигденскиот концерт, гостиварското културно уметничко друштво ги започна своите програмски активности за оваа година. Во Гостивар планирани се уште три концерти до крајот на 2018-та. Инаку, ова беше 25-ти Велигденски концерт на друштвото во Гостивар.

ГАКУД „Браќа Ѓиноски“ е едно од најстарите културно-уметнички друштва во Македонија, кое постои скоро седум децении. По успешниот велигденски концерт пред домашната публика, друштвото во понеделник, на 9-ти април патува за Македонски Брод, каде ќе настапи на манифестацијата Велигденски кули.