Велигденски подароци за децата од здружението „Топла рака“ и Општина Гостивар

Во пресрет на големиот христијански празник Велигден, здружението „Топла рака“ во соработка со Општина Гостивар подготви пригодни подароци за 100 деца, кои беа поделени во дворот на црквата „Пресвета Богородица“ на градскиот плоштад.

„Ова е едно внимание кон децата со православна вероисповед за празникот Велигден. Подароци преку кои сакаме да се покаже духот на Гостивар, дека е град на заедништвото и соживотот, дека нема поделби. Вакви проекти имаме и за Рамазан Бајрам, и задоволство ни е што општината ги поддржува нашите иницијативи кои промовираат позитивни вредности“, рече Мимоза Лумани, претседател на здружението „Топла рака“.

Во дарувањето на децата беа вклучени советничките од општинскиот Совет: Њомза Шаќири, Соња Дамјановска и Јасмина Василеска.

„Општина Гостивар секогаш поддржува и излегува во пресрет на активности и проекти  на здруженија и организации коишто ги истакнуваат толеранцијата и соживотот. Целта е на ваков начин да се потенцира важноста од меѓусебното почитување на овие простори, беа оглед на верската и национална припадност“, рече советничката Шаќири.

Во кесите со подароци децата добија боенки, фломастери, велигденски кошанички, украси и друго.