Велика Сабота – ден на покојот и исчекување на воскресението

Велика Сабота е последниот ден од Страсната седмица, која претходи на големиот христијански празник Велигден. Црквата ја слави Велика Саботата како “благословен седми ден”. Тоа е денот што ги спојува распнувањето и радоста, денот меѓу смртта и воскресението и според христијанското учење е ден на свештен трепет пред Христовото воскресение.

Велика Сабота е ден на покојот и покојникот, определена како ден за чување на гробот. Денеска верниците се крај Христовиот гроб, се поклонуваат пред Плаштеницата, на која е претставено телото Господово при погребението и положено во гробот.

Вечерва верниците масовно одат во црква и со себе носат црвени јајца. По трикратниот опход околу црквата со пеење на Воскресение Христе Твое Спасе, на полноќ бијат камбаните и се објавува веста за Исусовото воскреснување.