Верниците со исламска вероисповед слават Фитр Бајрам

Верниците муслимани денес и во наредните два дена го слават празникот Фитр Бајрам, со кој завршува светиот месец Рамазан. По едномесечниот пост, во кој се воздржуваа од храна и пијалоци од зора до зајдисонце, утрово во џамиите се одржа утринска молитва, а празничниот ден се поминуваат во прослава со семејството, роднините и најблиските. Трпезата е богата, а неизбежни се слатките и традиционалната баклава.

Празникот Фитр Бајрам се смета за ден кога моќта на богатите се среќава со слабоста на сиромашните и се покажува милосрдие и солидарност. Ден кога пријателите ги обновуваат врските и кога душата се прочистува од гревови и наоѓа мир по недоразбирањата.

Рамазан, деветиот месец во исламскиот календар, воедно е и месец на објава на Куранот.