Весели: Регионот на Гостивар е безбеден, има намалување на криминалитетот

„Во текот на 2022 година на подрачјето што го покрива ОВР Гостивар бележиме тренд на  намалување на бројот на кривични дела за 12%. Цениме дека безбедносната состојба на  подрачјето кое го покриваме е стабилна, без посериозни нарушувања. Како одделение за внатрешни работи имаме добри резултати и зголемена ефикасност“, истакна меѓу другото началникот на ОВР Гостивар, Басри Весели на денешната седница на Советот на Општина Гостивар, на која се разгледуваше извештајот за работата на полицијата за минатата година.

Во текот на 2022 година на подрачјето на ОВР Гостивар вкупно се извршени 715 кривични дела, за кои се  поднесени вкупно 522 кривични пријави.

Во извештајот е наведено дека лани доминираат кривичните дела извршени во областа на класичниот криминалитет, пред се‘ имотните деликти, со намален број на извршени кривични дела за 16 %. Не се регистрирани  потешки форми на кривични дела со елементи  на  насилство и организирано делување на криминални банди во вршење на разбојништва, изнуди и уцени, грабнувања извршени од страна на непознати сторители.

ОВР Гостивар бележи зголемување на извршените кривични дела само во областа на класичен криминал за 6,5 % , а намалување на тешки кражби за 20 % и на кражби за 22 %.  Регистрирани се и намалување на откриени и пријавени кривични дела од областа на економскиот криминал за речиси 52 % , намалување на кривични дела од областа на недозволена трговија со дрога за  11,7 % и намалување на дела од областа на недозволена трговија со оружје за  60 % .

По презентирањето на податоците и дискусијата, советниците го усвоија извештајот за работата на гостиварската полиција за минатата година.