Вешта жена 2025 во Гостивар: Сплотени да шириме љубов, убавина и добрини!

Голем број гостиварки овој неделен ден го посветуваат на заедничка дружба, споделување позитивна енергија и креирање моменти за спомени, како дел од годинешното издание на манифестацијата „Вешта жена“ во Гостивар. Настанот, кој се одржува по тринаесетти пат, спојува кулинарски и креативни вештини со натпреварувачки дух и вредности на заедништво.

Како и секоја година, така и овојпат, трпезите се подготвени со внимание и љубов и секоја раскажува своја приказна.

„Годинава, имаме вкупно пет трпези, три натпреварувачки се во категоријата општински натпревар, а две се во „Гран при“. Сите имаат подготвено прекрасни јадења со преубави декорации на различни теми, како што може да се види, навистина се за воодушевување. Од натпреварувачките на општинско ниво ќе се избере една која ќе го претставува Гостивар на републичкиот натпревар, а двете Гран при исто така ќе го претставуваат Гостивар на републичко ниво.“, подвлече Мира Србиноска, организаторка на Вешта жена-Гостивар.

Во категоријата „општински натпревар“ годинава учествуваат: Моника Србиноска Бошкоски со трпеза „Пролет“, Хана Спасеска со „Кралска маса“ и Јасмина Топалоска со „Велигденска маса“. Гран при трпезите се на Емилија Србиноска – „Мостот на љубовта“ и Менка Станкоска – „Валентајн“.

Мисијата на Вешта жена е да шири љубов, да сполотува и да поттикнува добрина, потенцира претседателката на здружението Снежана Стојановска-Жана.

„Во Вешта жена веќе 33 години го пренесуваме убедувањето дека само во љубовта е вистината, да споделиш љубов и добрина не треба многу. За да бидеш човек треба само споделиш љубов, сакај ги луѓето и тие ќе те сакаат. И тоа взаемно ќе се споделува. Секогаш кога размислувате и правите така, во насока за љубов и добрина, на ист начин ќе ви се врати. „Вешта жена“ докажува дека носи порака на сплотување, не само меѓу жените, туку и општо меѓу другите луѓе, а со акцијата за донирање лектири на македонски јазик во Лесковац – Србија докажавме дека сплотуваме и преку граница“, рече Стојановска.

Републичката Вешта жена 2025 ќе се одржи во мај.