Ви остануваат уште неколку часа да проверите дали ве има во Избирачкиот список

Течат последните часови од рокот за јавен увид во Избирачкиот список. Увидот завршува вечерва (9 септември) точно на полноќ. Граѓаните имаат последна можност да направат проверка дали се запишани во списокот и дали нивните податоци се точни.  По завршување на рокот, нема шанси за промени и реакција.

Увидот на гласачите од територијата на општина Гостивар се врши во гостиварското подрачно одделение на Државната изборна комисија чии простории се наоѓаат во подрачното одделение на Министерството за правда, во објектот до општинската зграда. Проверки се вршат и преку интернет и токму онлајн формата е таа која граѓаните најмногу ја користат за увид во списокот.

Државната изборна комисија во рок од пет дена по завршување на увидот треба да го достави списокот до политичките партии. Тие имаат рок 5 дена од приемот да достават барања за запишување, бришење или промени. Избирачкиот список со сите промени отпечатен, ДИК треба да го заклучи најдоцна до 24 септември.