Викенд акција на сообраќајците во Гостивар: Казнети 12 возачи на мотори, двајца поминале со опомена

Полицијата во Гостивар во текот на викендот што измина повторно спровела акциска контрола, во чие средиште биле мотоциклистите, односно како и колку тие ги почитуваат сообраќајните правила и прописи.
Во акцијата биле откриени вкупно 14 прекршоци. Најчести биле управување без возачки дозволи, истечена регистрација и воопшто нерегистрирани мотоцикли.

„Откриените недостатоци заокружени се со 12 прекршочни платни налози и 2 писмени опомени, додека осум од контролираните веднаш биле исклучени од сообраќај. Целта на овие активности е однапред да се превенираат сообраќајни несреќи како последица на управување без дозвола, техничка неисправност, пребрзо возење и слично, дотолку повеќе што мотоциклистите и натаму во значителен број се движат деновиве по гостиварските и околните патишта“, соопштија надлежните.