Викенд предлог од бабината кујна: Гибаница со кисело млеко

Домашно подготвена пита е секогаш добредојдена на трпезата, особено за викендите кога целото семејство се собира на заедничко јадење. Уште кога питата е правена по традиционален рецепт, задоволството е максимално. Токму затоа, ви предлагаме да подготвите гибаница со кисело млеко, нешто кое во минатото домаќинките често го ставале на маса. За подготовката да оди побрзо и поедноставно користете готови кори, инаку оригиналниот рецепт бара и корите да бидат домашни.

состојки:

500 гр кори за пита

5 јајца

3 чаши кисело млеко

1,5 дл масло

сол

подготовка:

Најпрво изматете ги јајцата, киселото млеко и маслото и додадете сол. Во подмачкана тава, ставете три кори, па потоа намачкајте со изматената смеса. Врз тоа ставете две кори и повторувајте ја постапката сѐ додека не ви се потрошат сите кори. Одозгора премачкајте со масло. Ставете ја гибаницата во рерна и печете на 200 степени додека не зарумени.