Викендов традиционално искачување на Титов Врв

Планинарскиот клуб „Љуботен“ од Тетово по 40-ти пат организира традиционално искачување на Титов Врв, највисокиот врв на Шар Планина, со височина од 2,747 метри. Планинарскиот настан ќе се одржи на 28 и 29 мај.

„Искачувањето на Титов Врв стана препознатлив планинарски бренд во Република Македонија. Со вакви настани, нашата земја гради традиција која трае и нѐ претставува пред меѓународната јавност, истакнувајќи ја грижата за здравјето и благосостојбата на населението, зачувувањето на природата и стремежот кон одржливо живеење и одржлив развој. Организацијата и масовноста на овој настан е знак на препознавање на П.К. Љуботен. Во текот на изминатите 39 искачувања на Титов Врв среќаваме бројка од речиси 30 000 искачени планинари.“, соопштија од ПК „Љуботен“, кој годинава прославува 97 години од постоењето.

Од клубот наведуваат дека поради променливите временски услови, очекуваат бројот на искачени планинари да биде над 500 од Македонија, Албанија, Бугарија, Србија, Косово, БиХ, Хрватска, Словенија и др.