„Влеговме во НАТО, можеме и во ЕУ“ – изјава на Драгољуб Филипоски кандидат за пратеник од СДСМ

Во денешната изјава на кандидатот за пратеник од коалицијата „Можеме“ што ја предводи СДСМ, Драгољуб Филипоски фокусот е ставен на политиките за евроатланските интеграции.

„Влеговме во НАТО, можеме и во ЕУ – СДСМ носи сојузници, ВМРО-ДПМНЕ нуди конфликт. Од едната страна е членството во НАТО, од другата страна е белата барокна палатa. Од едната страна се Брисел и преговорите со ЕУ, од другата страна се Хунзите, Белизе и Субрата Роj. СДСМ нуди кадри кои земјата ја однесоа на прав пат, ВМРО-ДПМНЕ ги нуди луѓето на Груевски. Пред три години нашата држава беше во длабока изолација, заробена во режим, скарана со соседите, без никаква евроинтегративна перспектива. Процесите на интеграција во ЕУ и НАТО беа на маргините, додека режимот правеше се за да ја држи земјата што подалеку од двата најмоќни светски сојузи. За само три години, преку одговорни, државнички политики, успеавме да ја вратиме државата на правиот пат, на патот на евроинтеграциите. Денес сме 30 земја членка на НАТО, еднакви во најсилниот и најважен воено-безбедносен сојуз. Нашите граници се трајно обезбедени, а нашата национална безбедност и сигурност никогаш не биле на повисоко ниво.“, изјавува Филипоски.

Во обраќањето кандидатот за пратеник од СДСМ од Гостивар нагласува дека членството во НАТО е влезна карта за Европската Унија, од кои фондови за земјава биле обезбедени 2,5 милијарди евра.

„Тоа се повеќе пари за справување со коронакризата, за новата македонска економија, за зелена агенда, енергија, конкурентност, капитални инвестиции, земјоделство, канализации, патишта, водовод. Тоа се европски пари за европски стандарди дома. ВМРО-ДПМНЕ три години правеше се да го блокира напредокот кон ЕУ и НАТО, се промовираше како анти ЕУ и анти НАТО партија предводена од антизападниот Мицкоски. Денес Мицкоски и ВМРО-ДПМНЕ се закана за членството во НАТО и интеграцијата во ЕУ, тие нудат само обнова на режимот, тие сакаат државата да биде изолаирана, да ги манипулираат граѓаните со лажни митови и лажен патриотизам додека парите завршуваат во белиот дворец. Граѓаните тоа нема да го дозволат, на 15 јули тие ќе одберат да продолжиме на прав пат кон ЕУ и НАТО и нема да дозволат враќање на изолацијата и обнова на режимот.“, подвлекува Филипоски.