Внимавајте! Измамници во Гостивар зеле пари од минувач и му дале празна торбичка

Шеесет и четиригодишен жител на гостиварско село, вчера (4 октомври) во 12 часот и 20 минути во СВР Тетово пријавил дека околу 11 часот на улица „Беличица“ во Гостивар две машки лица, од кои едното зборувало на арапски јазик, го измамиле и му одзеле пари. Станува збор за сума од околу 30.000 денари.

Според пријавеното, тие му ги побарале парите наводно за да ги покажат на сопругата на едното лице и при тоа му оставиле торбичка со девизи како гаранција дека ќе се вратат. Како што е пријавено, откако не се вратиле, тој ја отворил торбата и забележал дека во неа нема девизи и сфатил дека е измамен.

„Се преземаат мерки за расчистување на случајот. СВР Тетово апелира граѓаните да внимаваат, пред се повозрасните и да не наседнуваат на измислени приказни што им ги кажуваат непознати лица.“, нагласуваат од полицијата.