Внимавајте! Полицијата засилено ги контролира пешаците во Гостивар

Од петокот (6 декември) започнаа засилени полициски контролни активности насочени кон пешаците и нивното однесување во сообраќајот на гостиварското и на тетовското подрачје. Како што информира МВР, Притоа, досега биле откриени вкупно 34 прекршоци, од кои 25 во Тетово и 9 во Гостивар. Пешаците коишто не ги почитувале правилата и прописите биле соодветно санкционирани.

Најголемиот дел од прекршоците се однесувале на преминување на улиците надвор од пешачки премин, а имало непочитување на светлосните сообраќајни знаци или знаците што ги дава полициски службеник.

Искуствата и анализите покажуваат дека кај пешаците, недостасува чувство за нивното активно учество во сообраќајот и недостасува одговорност дека и за нив важат сообраќајните правила и прописи, како и за сите други учесници во сообраќајот.

Во пресрет на доаѓањето на печалбарите во родниот крај и зголемување на сообраќајната динамика, полицијата апелира на поголема внимателност на возачите и пешаците, со цел да се избегнат несреќи.  На возачите им се советува да ја намалат брзината пред пешачките премини, особено на пофреквентните улици, а до пешаците, пак, се упатува апел прописно да се движат и да не ги преминуваат улиците каде што ќе стигнат, туку само на обележани премини и целосно да ги почитуваат сообраќајните знаци и светлосна сигнализација.