Во Чегране одземени предмети врзани со меѓународни измами од 30 МИЛИОНИ ЕВРА

Во рамки на меѓународна истрага за криминални активности во повеќе држави во Европа за онлајн измами во вкупна вредност од 30 милиони евра, во гостиварско Чегране биле одземени предмети поврзани со случајот.

МВР соопшти дека во координација со Основно Јавно обвинителство за гонење на организиран криминал и корупција, Секторот за компјутерски криминал и дигитална форензика – Одделение за истраги за компјутерски криминал, како дел од меѓународната координирана активност на 11 мај во 6 часот бил извршен претрес, по добиена судска наредба, во дом и деловни простории на 34 годишен жител на Чегране, при што биле одземени предмети кои се поврзани со вршењето на криминалните активности, а лицето е обезбедено.

Исто така, од страна на Секторот за компјутерски криминал и дигитална форензика – Одделение за истраги за компјутерски криминал, со судски наредби, извршени биле претреси на деловни простории на правни лица во Скопје, при што било констатирано дека адресите кои се пријавени во Централен регистар се лажни и не постојат.

Криминалните активности се вршеле во повеќе држави во Европа, а се повразни со измами во вкупна вредност од 30 милиони евра со злоупотреба на онлајн-трејдинг платформи, криптовалути и перење пари, привлекувајќи ги жртвите преку реклами на социјалните медиуми. Групата оперирала преку неколку интернет страници за трговија кои биле изработени професионално, со софтвер за манипулација, кол-повици и алатки за интернет маркетинг. На потенцијалните жртви им се претставувале како искусни брокери, а ги контактирале преку кол-центри во Бугарија и нашата земја.

„Шемата за измама, била организирана главно од израелски државјани, вклучувала центри за повици од Бугарија и Република Северна Македонија, а осомничените ги переле нелегалните профити преку банкарски сметки контролирани од компании со седиште во различни земји на ЕУ.“, извести МВР.

Во рамки на истрагата лишени од слобода биле 11 лица (пет во Бугарија и едно во Израел на денот на акцијата и шест лица претходно во Шпанија), извршени биле претреси во Бугарија, Израел, Полска, Северна Македонија и Шведска и запленети бројни електронски уреди и возила, а банкарските сметки се замрзнати.