Во четврток во Гостивар манифестација по повод Илинден

Големиот празник Илинден, во Гостивар ќе биде прославен со свечена манифестација под мотото „Наша Македонија“. Настанот ќе се одржи во четврток (1 август), во Летниот амфитеатар на Кејот на Вардар, со почеток во 19 часот.

Деведесетминутната програма опфаќа настап на гостиварското градско аматерско културно-уметничко друштво „Браќа Ѓиноски“ и КУД „7-ми Септември“ од Македонски Брод. Празничната атмосфера ќе ја надополни младата гостиварка Кристина Јовановска, којашто ќе се претстави со неколку музички изведби.

Од организацискиот одбор на манифестацијата упатуваат покана до граѓаните да дојдат и да го проследат настанот, со што ќе придонесат за достоинствено чествување на државниот празник Денот на Републиката – 2 Август.