Во црквите и џамиите утре молтива за мир во Украина

Здружението на Украинци во Република Северна Македонија „Лесја Украинка“ соопшти дека утре во верските објекти во земјава ќе се одржат молитви за мир во Украина и во целиот свет.

„Во војната во Украина веќе загинале илјадници луѓе од различна националност и верска припадност, крвопролевањето секоја минута продолжува. Поради тоа Здружението на Украинци во Република Северна Македонија „Лесја Украинка“, со дозвола на верските заедници во земјата, ги повикува верниците од различна вероисповед на 1 мај 2022 година (недела) на целата територија на Република Северна Македонија во верските објекти според својата вероисповед и своето место на живеење да се придружат кон организираните религиски обреди со молитви за мир во Украина и во целиот свет. Сите сме различни, но мирот ни е потребен на сите! Да се помолиме за прекин на војната, на бесмислено и немилосрдно убивање! “, се вели во соопштението.

Како што е наведно Македонската Православна Црква ќе служи Молебен за мир, веднаш по светата Литургија, која почнува во 8 часот, Исламската Верска заедница една од петте молитви ќе ја посвети за мир во Украина, а во Македонската Католичка црква почетокот на мисата за мир во Украина е во 10.30 часот.