Во Галичник утре концерт во чест на 100 години од раѓањето на Александар Сариевски

Во живописниот Галичник, утре (15 јули) во предвечерието на Галичката свадба ќе се одржи целовечерен концерт со кој ќе се одбележат  100 години од раѓањето на македонската музичка легенда, Александар Сариевски. Програмата на концертот ќе биде исполнета со настапи на оркестарот на НУ „Танец“ и Стефче Стојковски и вокалните солисти: Наум Петрески, Благоја Грујовски, Светлана Јовановска, Сашо Гигов и Снежана (Сариевска) Јовановиќ.

Почетокот на настанот, кој се организира на Чешма Упија, е закажан за 21 часот.

Александар Сариевски е роден на 20 јуни 1922 во Галичник. Средно образование завршил во Скопје, а како средношколец почнал да свири хармоника. Во 1946 во тогашно Радио Скопје ја снимил песната „А бре невесто око калешо“, со која ја почнува својата богата и плодна музичка кариера. Оставил над 400 трајни звучни записи за Музичката продукција на МРТВ и за други дискографски продукции, а најпозната песна му е „Зајди, зајди јасно сонце’. Саривески е еден од основачите на ансамблот „Танец“.

Почина на 19 декември 2002 година.