Во Галичник утре започнува традиционалната ликовна колонија

Галичник ќе биде домаќин на уметници од странски земји и од Македонија во рамки на традиционалната ликовна колонија, која годинава се одржува по 28-ми пат.

Во неповторливата природа на галичкиот крај една недела ќе творат: Светлана Волиќ од Србија, Симон Далеманс од Белгија, Фидан Бејтулаху од Косово, Јулиа Хопкинс од Велика Британија, Рената Папишта од Босна и Херцеговина, Рок Богатај од Словенија и Ана Ивановска и Ангел Миов од Македонија. Учесниците ќе имаат можност и да прошетаат низ живописните предели на Галичник и околината и да посетат локалитети и објекти препознатливи за регионот.

Галичката ликовна колонија е дел од Галичко културно лето, манифестација со долга традиција и богата програма. Освен ликовната, во рамки на културното лето секоја година се одржува и книжевна колонија, единствена од ваков вид на Балканот.