Во гимназијата во Гостивар изложба посветена на Ана Франк: Поттик за мир и подобрување на општеството

Четириесетина изложбени панели со детали од животот на малата Ана Франк и нејзиното семејство од Втората светска војна, се поставени во холот на средното општинско училиште-гимназија Гостивар.Изложбата која беше отворена денес, носи наслов „Ана Франк – Историја за денес“, а целта е младите да се запознаат со животниот пат на Ана, да црпат инспирација од непоколебливиот и нескршлив дух на девојчето, како и да се поттикне дискусија за настаните од блиското минато на Западен Балкан кои се причина за поделби и конфликти.

Организатори на изложбата се Младински образовен форум и Куќата на Ана Франк од Амстердам, а во Гостивар локален партнер е Центарот за млади и заедницата (YCC).

„Ова е одлична прилика за сите средношколци од различни средини да се соберат и да научат нешто повеќе за блиското минато, пред сѐ да се поврзат со приказната за Ана Франк и каков импакт има таа денес врз општеството. Животот и делото на Ана Франк може да ги поврземе со денешната историја, да заклучиме дека историјата се повторува, сите тие грозоморни работи кои се случиле во Втората светска војна, можеме да видиме дека и денес се манифестираат. Оваа изложба е токму поттик за подобрување и мир во општеството“, изјави Панде Ефтимов од Младински образовен форум.

Интересно е што изложбата содржи и панели кои се креирани посебно за македонскиот контекст во периодот по Втората светска војна до денес. Водичи за посетителите се млади волонтери, кои претходно поминале обука за да ја раскажат приказната на Ана Франк. Изложбата останува отворена во холот на гимназијата и во текот на следните денови.

„Чест ни е што како гимназија Гостивар сме домаќини на оваа изложба, која е актуелна и денес преку надминување на стереотипи и предрасуди. Ние како училиште ги негуваме настаните поврзани со иницијативи на младата популација, младите генерации. Наша желба е она што се случувало со малата Ана Франк и терорите во Втората светска војна никогаш да не се повторат“, истакна на отворањето заменик директорката на гимназијата, Светлана Јовановска.

Изложбата во Македонија се реализира во рамки на проектот „Хисторија, Историја, Повјест – Лекции за сегашноста“ и до сега била поставена во 34 општини.