Во Гостивар 1.850 пациенти примаат инсулин – Светски ден на борба против дијабетот

Датумот 14-ти ноември секоја година се одбележува како Светски ден на борба против дијабетот. Меѓународната Федерација за дијабетес, алармира со податоци дека  околу 8,8 % од возрасната популација има дијабет, од кои 95% се од тип 2. Бројот на лица со дијабетес расте од година во година и се проценува дека до 2.040 година бројот на заболени од ќе се зголеми за 200 милиони лица.

Во Македонија има околу 200.000 лица со дијабетес тип 1 и тип 2, од кои околу 43 000 лица примаат инсулинска терапија. На детската клиника годишно се регистрираат триесетина деца со дијабетес тип 1, инсулински зависни. Според податоците од Кабинетот за дијабет во гостиварската општа болница, бројот на пациенти кои примаат инсулин е 1.850. Од нив, дијабет тип 1 имаат 54. Лекарите проценуваат дека на гостиварското подрачје има околу 7.500 граѓани кои страдаат од шеќерна болест, а се лекуваат со таблети.

Превентивата и контролата на болеста се во насока на практикување на активен животен стил и исхрана богата со овошје, зеленчук, внесување протеини преку немлечни и млечни производи. Препораките вклучуваат и пешачење по најмалку половина час дневно, умерена физичка активност и одржување на телесната тежина.