Во Гостивар годинава родена една тројка и седум пара близнаци

За прв пат после една деценија во болницата во Гостивар, годинава се родила тројка. Медицинската екипа на гинеколошко-акушерското одделение ќе ја памети 2016-та по овој редок убав настан.

Статистиката од ова одделение покажува дека од почетокот на годината во Гостивар се родени над 700 бебиња. Бројката на новородени бележи тренд на опаѓање. Ако се спореди со истиот период од лани, намалена е за над 100. Сепак, лекарите сметаат дека тоа не значи и толкав процент на намалување на наталитетот во гостиварско, туку се должи на фактот што се поголемиот број мајки се решаваат породувањето да го направат во здравствена установа надвор од Гостивар, најчесто Скопје или во Тетово. Проценката е дека околу 200 гостиварки годишно своите бебиња ги раѓаат надвор на градот.

За разлика од единствената тројка, во 2016-та во гостиварската болница биле родени седум пара близнаци.

Инаку, Гостивар е една од ретките општини во Македонија која години наназад бележи позитивна стапка на природен прираст, односно повеќе новороденчиња отколку починати.