Во Гостивар казнети мотоциклисти – Не носеле кацига, немале дозвола и осигурување

Вчеравечер (23 август) во периодот од 19 до 24 часот, полициски службеници на СВР Тетово спровеле засилена акциска контрола на мотоциклисти, во која биле откриени и законски санкционирани вкупно 14 прекршоци (Тетово-10 и Гостивар-4). Најголемиот број од прекршоците (5) се однесувале на неносење заштитна кацига, односно шлем (ТЕ-3 и ГВ-2), 4 мотоциклисти (ТЕ-3 и ГВ-1) не поседувале осигурителни полиси, 3 немале возачки дозволи (ТЕ-2 и ГВ-1), 1 управувал нерегистриран мотоцикл, а кај 1 констатиран е друг вид прекршок. На сите мотоциклисти-прекршители изготвени им се поднесоци и ќе се соочат со предвидените парични глоби. При контролата биле санкционирани и 8 други видови сообраќајни прекршоци.

„Секторот за внатрешни работи Тетово повторно ги потсетува мотоциклистите на нивните законски обврски како учесници во сообраќајот и посебно апелира да не седнуваат зад волан без положен возачки испит и без пропишаната заштитна опрема. Зашто, во спротивно најдиректно ја доведуваат во ризик сопствената и безбедноста на другите возачи или пешаци. До мотоциклистите се апелира, исто така, да не возат пребрзо и да внимаваат на бучавоста на нивните мотоцикли, особено во вечерните часови и по градските улици. Вакви и слични контролни активности планирани се и во наредниот период и сите откриени прекршоци ефикасно ќе се санкционираат. Истото се однесува и на оние кои управуваат електрични тротинети и кои нема да се придржуваат на законските ограничувања и прописи.“, соопшти полицијата.