Во Гостивар ќе се одржи Концерт на народни песни и ора во чест на Илинден

Големиот македонски празник, Денот на Републиката – Илинден во Гостивар ќе биде одбележан со пригоден настан. Во духот на македонските традиции, во чест на празникот најавен е Концерт на народни песни и ора, кој ќе се одржи на 1-ви август (понеделник) во Летниот Амфитеатар покрај Кејот на Вардар.

Празничната програма ќе биде исполнета со настапи на Градското аматерско културно-уметничко друштво „Браќа Ѓиноски“ од Гостивар, културно-уметничкото друштво „Младост“ од Кичево, како и на вокалните солисти Мирослав Крстески и Јовица Николоски.

„Сакаме со нашите народни песни и ора, преку моќта на македонската традиција, вековните вредности кои се пренесуваат од колено на колено, заеднички да го чествуваме Илинден. Упатувам покана до граѓаните да присуствуваат и заедно да го прославиме формирањето на македонската држава“, вели организаторот на настанот, Предраг Ристески.

Концертот е закажан со почеток во 19 часот.