Во Гостивар ќе се постават 60 контејнери за селектирање отпад

На повеќе локации во Гостивар ќе бидат распоредени 60 контејнери за селекција на отпад. Проектот, со кој се цели да се создадат поадекватни услови за селектирање на ѓубрето е на Министерството за животна средина и просторно планирање, а ќе се спроведе во соработка со локалната самоуправа.

„Министерството побара од нас како општина да лоцираме места на кои ќе се постават 60 контејнери, од кои 30 во жолта и 30 во сина боја во кои ќе се селектира хартија, картони, лименки и пластика. Тие ги обезбедуваат за општините кои имаат над 23.000 жители.  Ги инфромирав во ЈП Комуналец и побарав да одредат контакт лица за координација. Очекуваме информација од Министерството кога ќе почнат да се расподелуваат контејнерите“, вели Зуди Џелили, раководител на Секторот за животна средина во општината.

За да се подигне свеста на граѓаните за значењето од чување на јавната чистота и селектирањето отпад ќе се реализираат повеќе активности. Една од нив ќе биде генерална акција за чистење заедно со училиштата и институциите на Денот на екологијата.