Во Гостивар ќе се постават ПЛАСТИКОМАТИ – остави пластично шише, земи пари!

На неколку места во Гостивар наскоро ќе бидат поставени пластикомати, посебни апарати каде граѓаните ќе можат да одлагаат користена пластична амбалажа и за тоа да добијат пари. Проектот ќе го спроведе Јавното претпријатие за паркинзи и зеленило, со цел почиста животна средина и стимулирање на граѓаните за селекција на отпадот. Пластиката која ќе се собере во апаратите, потоа ќе се рециклира преку фирма која се занимава со таква дејност.

„Планираме да поставиме неколу пластикомати, каде граѓаните ќе може да ги остават пластичните шишиња, знаеме дека таквата амбалажа доста се користи, а е сериозен проблем за животната средина. Парите што притоа ќе ги добијат, може да ги искористат за плаќање на паркинг, или за други намени. Целта е да имаме почист град и граѓаните да стекнат навика да го селектираат отпадот“, појасни директорот на претпријатието Беким Челебиу.

Во зависност од големината на шишето, ќе се даваат од 0,5 до 1,5 денари. Според најавите пластикоматите ќе бидат ставени во функција во текот на овој месец.