Во Гостивар ќе се постават уште две мерни сензорни аеро станици

Гостивар ќе добие уште две мерни станици со ласерски сензор за квалитетот на воздухот. Како мрежа, заедно со постоечките три, во иднина ќе даваат поцелосна слика за состојбата со аерозагадувањето во градот.

Според најавите, новите мерачи ќе бидат ставени во функција за околу две недели. Локациите се‘ уште се под знак прашалник, но најверојатно тоа ќе биде на патот кон Русино кај некогашните касарни и во околината на некогашна Силика.

За таа цел, Општина Гостивар потпиша меморандум за соработка со група граѓани кои претходно  веќе поставија две сензорни станици за квалитет на воздухот.  

„Податоците од мерните станици ќе се прикажуваат на веб страницата на општината. Важно е граѓаните да може точно да се информираат дали и колку е загаден воздухот. Се надевам дека ова е само почеток на нашата соработка. Доколку има потреба, во иднина ќе поставуваме мерни станици и на други локации, кадешто има потенцијални загадувачи.“, изјави градоначалникот Арбен Таравари, кој денес во својот кабинет ги прими Благоја Беловинов и Богдан Јелискоски, дел од тимот млади гостиварци што го реализира проектот за сензорски мерни станици.

„Целата идеја со Богдан започна зимата 2017 кон 2018 година кога во Гостивар немаше ниедна мерна станица и не можеше да се добие информација колку е загаден воздухот, иако беше очигледно дека има загадување. Решивме да направиме наша сензорска мрежа, потоа од општината рекоа дека и тие се заинтересирани за таков проект, бидејќи имаат план да воспостават мрежа.“, рече Беловинов.

Јелискоски додаде дека резултатите од мерењата се релевантни, затоа што се работи за напредна технологија.

„Мерните сензори се прилично напредна технологија, моментално ги поставуваме и на клауд, што значи обезбедуваме максимален аптајм на самиот сервер. Имаше некои забелешки, дека на промена на времето топло-ладно би имало дискрепанца во мерењата, но во овие две години, не сме забележале некои значителни промени во резултатите.“, рече Јелискоски.

Државната мерна станица е поставена во дворот на ОУ „Гоце Делчев“, а сензорните кај големиот пазар и близу бензинската на Макпетрол.

„Со новите две станици и таа мрежа на вкупно пет, распоредени на различни делови од градот мислам дека ќе имаме добар мониторинг и ќе ги инофрмираме граѓаните каков воздух дишат“, изјави Зуди Џелили, раководител на секторот за животна средина во општината.