Во Гостивар ќе се постави спомен плоча на загинатите во несреќата од 13 февруари

Во чест и сеќавање на жртвите во трагичната несреќа со автобусот на Дурмо турс, која се случи пред три години, во Гостивар ќе се подигне спомен обележје. Иницијативата ја покренува гостиварската локална самоуправа и ќе се спроведе во координација со општинскиот Совет и семејствата на загинатите.

„Го одбележуваме датумот во центарот на Гостивар за да се потсетиме на овој трагичен ден, со порака да не се повтори никогаш повеќе. Вечерва би сакал да најавам една иницијатива за поставување спомен плоча со имињата на загинатите во трагедијата. Тој споменик ќе биде или во малиот парк во центарот на градот, или во големиот парк, или на друго важно и видливо место за да не потсетува на настанот. Иницијативата ќе ја развиваме со советниците во Советот на општина Гостивар и со семејставата за да утврдиме која ќе биде најпогодна локација.“, изјави градоначалникот Арбен Таравари вечерва на спомен настанот во сеќавање на жртвите, што се одржа во малиот парк во центарот на Гостивар.

На собирот, од фонтаната кон небото беа пуштени 16 рефлектори во боја, симболично за 16 изгубени човечки животи.