Во Гостивар лани склучени 643 бракови, бројката значително зголемена

Според податоците на Државниот завод за статистика, бројот на склучените бракови во 2021 година во земјава, во споредба со претходната година, е зголемен за 29.8 % и изнесува13 337. Најмногу бракови, 1 981 или 14.9 %, се склучени во месец август, а најмалку во месец април, 667 или 5.1 %.

Најчесто е стапувањето во прв брак со учество од 94 % за жените и 93.3 % за мажите. Во втор брак со учество од 6.2 % и во трет брак со учество од 0.6 %, во вкупниот број склучени бракови, почесто стапуваат мажите.

Во 2021 година, најголем број бракови биле склучени во старосната група од 25 до 29 години, односно 4 392 или 32.9 %  кај жените и 4 959 бракови или 37.2 % кај мажите.

Просечната возраст при склучување прв брак е 27 години за невестата и 29.8 години за младоженецот.

На територијата на Општина Гостивар лани биле склучени 643 бракови, што е за 132 повеќе од 2020-та година. И во соседните општини има зголемување на новоформираните брачни заедници. Минатата година во Општина Врапчиште брак склопиле 243 парови, што е за 34 повеќе од претходната, додека во М.Ростуше лани имало 74 нови бракови, односно 33 повеќе.

Во 2021 година на државни ниво се случиле 1.964 разводи, што претставува зголемување од 25.2 % во споредба со 2020 година. Во текот на годината, најмалку бракови, 70 или 3.6 %, се разведени во месец август, а најмногу, 202 или 10.3 %, во месец декември.