Во Гостивар манифестација „Да ја продолжиме традицијата“ – Горди и силни рурални жени

Со пораки да се сочуваат и пренесуваат традициите од поднебјето на идните генерации, денес во Гостивар се одржува манифестација „Да ја продолжиме традицијата“, во организација на здружението на жени фармери „Моја Фарма“.

Во настанот учествуваат припаднички на понежниот пол од рурални средини, кои презентираат традиционални специјалитети, органски произведен зелечук, овошје, зимници, како и уникатни ракотворби.

Во последните години здружението „Моја фарма“ од Гостивар ги зголемува своите активности во реализација на проекти коишто ги опфаќаат темите на родова рамноправност во земјоделството, производството на органска храна, жена фармер-жена претприемач итн.

„Жената земјоделка најчесто е или на нивата или во домот грижејќи се за децата и постарите лица, па речиси и да не и преостанува време да посвети на сопствените потреби и нејзината еконосмка и социјална инклузија во општетсвото. Дополнително и повеќе од јасно е дека иако работи рамноправно со мажот во семејството речиси никогаш нема посебни сопствени приходи, па е целосно зависна од мажот, а за имот на свое име и да не зборуваме. На оваа манифестација руралните жени имаат можност да ја промовираат својата умешност во подготовка на традиционална храна, да остварат контакти со други рурални жени и разменат искуства кои можат да им послужат за во иднина да отворат сопствен бизнис. Како и секоја година наши гости се и членките на Здружението „Радика“ од Дебар кои се занимаваат со изработка на ракотворби. “, изјави Ранкица Божиноска од здружението „Моја фарма“, со напомена дека особено радува фактот што многу млади се вклучуваат во здружението и покажуваат интерес за активностите..

Манифестацијата „Да ја продолжиме традицијата“ се одржува по четврти пат со поддршка на Министерството за земјоделство, шумарство и водостопанство.