Во Гостивар навреме почна гласањето на сите избирачки места

Сите избирачки места на подрачјето на општина Гостивар утрово беа отворени навреме во 7 часот и гласањето до сега се одвива без проблеми, информираат од општинската изборна комисија. Може да се забележи дека во раните утрински часови нема некоја поголема раздвиженост. На гласање вообичаено први пристигнаа пензионерите, а Избирачките одбори водени од искуството, очекуваат поголем број на гласачи после 12 часот.

Во Гостивар изборите се одвиваат на вкупно 121 избирачко место. Право на глас имаат 76.362 полнолетни граѓани.

Потврдна информација за навремен старт на изборите добивме и од општинските комисии на Врапчиште и Маврово Ростуше.

Гостиварпрес медиумски ќе го следи изборниот процес во гостиварскиот регион и во текот на денот во неколку наврати ќе објавува информации.

Ова се деветти парламентарни избори во Македонија, четврти предвремени.