Во Гостивар нема морбили, се вршат вонредни проверки на вакциналните картони

По прогласувањето на епидемија на мали сипаници-морбили во реони на Скопје, низ целата територија на Македонија се преземаат вонредни превентивни мерки. Според информациите од епидемиолошкото одделение во Гостивар, на гостиварското подрачје до сега не е регистриран ниту еден случај на заболен од оваа болест, а во службата за вакцинација се прават вонредни контроли на вакциналните картони. Оние деца кои не ја примиле вакцината МПР, вонредно се вакцинираат.

Морбилите се заразно заболување со почетни симптоми слични на грип, објаснуваат лекарите: зголемена телесна температура, главоболка, малаксаност, солзење на очите, течење на носот, сува кашлица. Карактеристично е што во устата се појавуваат бели наслаги што се задржуваат два до три дена, а по еден до два дена се јавува осип на кожата.  Првиот осип обично се јавува навечер, во пределот на косата и по еден до два дена, се шири по целото тело.

Вирусот се пренесува преку воздух, со ситните капки секрет кои при кашлање, кивање и зборување ги исфрлаат болните или заразени лица.