Во Гостивар одбележан јубилеј 80 години од основањето на Црвен Крст – „Ние гледаме луѓе“

На пригодна манифестација, со доделување на јубилејни плакети, потсетување на историјатот и презентација на активности, денес во Гостивар беа одбележани 80 години од основањето на Црвениот Крст на Македонија.

На настанот под мотото „Ние гледаме луѓе“ присуствуваа членови и волонтери на организацијата на државно и на локално ниво, соработници, поддржувачи, претставници на институции, здруженија и слично.

„Идејата е да се сретнеме со нашата локална организација, но и со градоначалниците од ова подрачје и нивните тимови со кои соработуваме и ги покриваме со нашите активности, тоа е една можност да им се заблагодариме за поддршката. Волонтерите и вработените секојдневно прават добри работи и излегуваат во пресрет на луѓето, правиме и предизвикуваме позитивен ефект во заедницата. Се трудиме секаде кадешто е потребно да стигнеме. Свесни сме дека потребите се големи, но свесни сме и дека обврската и амбицијата наша е да стигнеме до што поголем број на луѓе.“, изјави генералниот секретар на Црвениот Крст на Македонија, Саит Саити.

Претседателот на Општинската организација во Гостивар, Бесник Зеќири во своето обраќање подвлече дека во работењето и спроведувањето на активностите најважна е соработката и меѓусебната поддршка на сите вклучени.

„Во прв план би ги истакнал нашите волонтери, вработените, и секако локалните самоуправи со градоначалниците, како и сите останати кои се дел од таа соработка. Важни се и медиумите кои ги покриваат нашите активности и ја пренесуваат реално важноста на она што го работиме. Верувам дека за овие осум декади, имаме многу направено и ние сме партнер на Владата во сите сфери на животот, се разбира фокусот ни е хуманоста“, рече Зеќири.

Позитивно се оценува што младите во голем број се вклучуваат во Црвениот Крст, стануваат активни и посветени волонтери.

„Во време кога младите имаат секакви понуд и можности, ние сепак успеваме да ги мотивираме дел од слободното време да го посветат на Црвениот Крст. Тоа ни дава надеж да кажеме дека иднината на Црвениот Крст не е загорзена, напротив дека е светла, затоа што нашите редови перманентно ги освежуваме со нови луѓе. Тоа е уште еден доказ дека Црвенот Крст“, оцени Саити.

На одбележувањето на градоначалниците на Општините Гостивар и Маврово Ростуше, Ваљбон Лимани и Медат Куртовски им беа доделени плакети во чест на јубилејот.

Присутните на настанот имаа можност да проследат видео презентации за историјатот на Црвениот Крст, спроведените проекти, како и активностите на гостиварската општинска организација.