Во Гостивар одбележан Светскиот ден на лицата со Даунов синдром

По повод 21 Март, датум кој важи за Меѓународен ден на лицата со Даунов синдром во Гостивар се организираше настан со заедничка дружба на деца, родители, претставници на здруженија на лица со попречености и општината. Симболично присутните ги обоија рацете во шарени бои и оставаа отпечатоци на обележјето со името на градот, покрај шеталиштето на Вардар.

„Овде сме заедно со децата со Даунов синдром и децата со посебни потреби, имаме активност и дружење по повод 21 Март, а потоа одиме на заеднички ручек. Ние како општина се обидуваме да направиме за овие деца најмногу што можеме, иако секогаш велам дека никогаш не е доволно. Во неколку училишта веќе има посебно опремени училници за децата со Даунов синдром и со посебни потреби, функционира Центар, има неколку канцеларии на невладини организации кои ги потпомагаме. Секогаш ни е задоволство и често се дружиме со нив за некои празници и одбележувања“, рече градоначалникот, Арбен Таравари.

Светскиот ден на лицата со Даунов синдром годинава се одбележува под мотото „Со нас – не за нас“ и е фокусиран на пристапот заснован на човековите права кон попреченоста – право да се третираат праведно, да имаат исти можности и слобода да направат сопствен избор.

„Децата со Даунов синдром треба да имаат редовни контроли кај нивниот педијатар или семеен лекар, бидејќи овие лица имаат поголема веројатност да развијат одредени заболувања од општата популација. Носете ги на редовни контроли за слух, вид и општото здравје. Охрабрете ги да бидат физички поактивни“, се вели во денешното соопштение од Министерството за здравство.

За овие лица се препорачува да посетуваат логопед за помош при зборување, физиотерапевт – за помош при одење, доколку имаат намален мускулен тонус, оптометрист и/или специјалист за слух – за помош со видот и слухот, како и да се разговара со семејниот лекар или педијатар за информации како дете може да ги добие овие услуги.