Во Гостивар отворени канцеларии за комуникација меѓу пратениците и граѓаните

Во Гостивар денес беа промовирани пратеничките канцеларии, наменети за олеснета комуникација меѓу гостиварските пратеници и граѓаните. Во канцелариите ангажирани се асистенти кои ќе ги запишуваат мислењата, проблемите и предлозите на граѓаните, додека дирекни средби со пратениците ќе може да се остваруваат секој петок.   

„Ја користам оваа прилика да ги поканам сите граѓани да ги посетуваат канцелариите, за да ги пренесат своите проблеми кои се во надлежност на Собранието, за да можеме ние како пратеници да им излеземе во пресрет.“, изјави Весел Мемеди, потпретседател на Собранието на Република Македонија и одговорен за пратеничките канцеларии.

И пратеникот од СДСМ, Благојче Трпевски ги повика граѓаните да ги посетат и да ги образложат проблемите со кои се соочуваат. „Тука сме да ги слушнеме проблемите на граѓаните на Гостивар, да соработуваме со нив и со локалната самоуправа се со цел, да помогнеме Гостивар да стане поубаво место за живеење. Отворени сме за соработка со сите без разлика на политичката припадност, затоа што сме избрани од граѓаните и треба да им служиме“, рече Трпевски.

Четири канцеларии се наоѓаат на приземје во објектот до општинската зграда (на пратениците Таљат Џафери и Мирсада Емини Асани од ДУИ, Дафина Стојановска од ВМРО ДПМНЕ, Благојче Трпевски од СДСМ и Весел Мемеди од НДП), а една во простории на гостиварски Комуналец (на Фадиљ Зендели од БЕСА).

Собранието на Република Македонија има одвоено буџет за 75 пратенички канцеларии, а до сега се отворени вкупно 22.