Во Гостивар паѓаат бројките на новозаразени со корона и на хоспитализации

Изминатите денови состојбата со коронавирусот на гостиварското подрачје се карактеризира со намалување на бројот на нови случаи, помалку пациенти кои имаат потреба од болнички третман, како и од амбулантски прегледи.

Официјалните податоци покажуваат дека од понеделник до петок, неделава, потврдени се 61 нов случај, додека како оздравени се евидентирани 104 лица. Активно болни моментално се 425 граѓани. Според последните информации од Министерството за здравство на инфективно и во ковид одделенијата во болницата во Гостивар се лекуваат 31 пациент.

И во потсмирена ковид состојба, лекарите ја повторуваат важноста за почитување на мерките на заштита: носење маски, одржување дистанца, да нема групирања, а хигиената да биде на високо ниво.

Од почетокот на пандемијата во општините Гостивар, Маврово Ростуше и Врапчиште  потврдени се вкупно 5.055 случаи на коронавирус.