Во Гостивар почнува со работа Центар за згрижување на жртви на семејно насилство

Жртвите на семејно насилство во Гостивар ќе добиваат засолниште и заштита во посебен Центар за згрижување. Таму, ќе им се пружа психолошка, медицинска и друг вид на неопходна помош и поддршка од стручни лица, за да можат да се справуваат со траумите предизвикани од претрпеното насилство.

На денешната седница на Советот на Општина Гостивар едногласно беше донесена одлука со што се овозможи почеток на работа на Центарот, под водство на невладината „Етика“ , која по објавен јавен повик е избрана од страна на Комисија.

„Ваков тип на проект е наше дамнешно барање. Нашата организација со оваа проблематика се занимава од 2003-та година и сметаме дека е нешто најпотребно за жртвите на семејно насилство. Центарот располага со простории од околу 105 метри квадратни, со капацитет за згрижување на 8 до 10 лица.“, рекоа од „Етика“.

Општина Гостивар за работата на Центарот ќе издвои 1 милион и 200 илјади денари.

„Сите постапки и процедури беа спроведени според правилници и прирачник, во кои, меѓу другото е наведено дека заради заштита на жртвите и нивниот идентитет, забрането е да се даваат информации за локација на Центарот и одредени детали“, појасни Имерлие Салиу од општинскиот Сектор за социјална заштита.

Семејното насилство е горлив проблем во чие надминување и ублажување на последиците треба да се вклучуваат сите релевантни институции, полицијата, социјалните служби, судовите, медицинските установи, граѓанските организации, училиштата, заедницата.

На гостиварско подрачје годишно се регистрираат и до педесетина кривични дела врзани со насилство во домот. Најчести жртви се жените, но од насилници страдаат и деца, родители, баби, дедовци…