Во Гостивар поставени инфо-табли за реката Вардар

Гостиварската локална самоуправа постави информативни табли за Вардар, кои содржат основни податоци за реката, испишани на македонски, албански, турски и на англиски јазик. Таблите се поставени близу шеталиштето крај Вардар, а утрово беа откриени во рамки на еколошката акција „Генералка викенд“.

„Ја користиме приликата да ги промовираме трите информативни табли со карактеристиките на реката Вардар. Ова место е многу атрактивно за посетителите и ги поставивме таблите за кога доаѓаат посетители од други места, странци, да ги знаат основните податоци за реката Вардар, која поминува низ нашиот град и го прави овој дел да биде највпечатлив и најубав“, рече Зуди Џелили, одговорен во општинскиот сектор за заштита на животната средина.

Вардар извира од гостиварски Вруток и е најголемата река во Македонија. Долга е 388 км и нејзиниот речен слив опфаќа површина од приближно 25.000 км².