Во Гостивар пријавени над 200 случаи на грип за една недела

Во периодот од 27 декември 2021 до 2 јануари 2022, во земјава пријавени се 565 случаи на грип/ заболувања слични на грип, соопшти Институтот за јавно здравје. Споредено со истиот период минатата сезона бројот е десетпати зголемен.

Во однос на возраста, 358 лица се на возраст од 15-64 години, 136 деца на возраст од 5-14 години, 54 се деца на возраст од 0-4 години и 17 лица на возраст над 65 години. Заболените се пријавени во: Гостивар – 202, Дебар – 174, Тетово – 73, Кавадарци – 35,  Охрид – 34, Куманово и Струмица – по 16, и во Штип и Скопје каде бројот на пријавени е помал од 10.

Во сезоната 2021/2022 вкупниот број на случаи на грип изнесува 1.713. Најголемиот дел од нив се регистрирани на територијата на Дебар, по што следува Гостивар.

Институтот за јавно здравје препорачува вакцинација на целото население, особено на лица кои припаѓаат на т.н. ризични групи. За сезоната 2021/2022, Министерството за здравство обезбеди бесплатна четиривалентна вакцина во вкупна количина од 40.000 дози, наменета за приоритетни групи население. Дополнителни 20.000 дози на четиривалентна вакцина се обезбедени преку донација од PIVI (Partnership for Influenza Vaccine Introduction).

Според податоците од Управата за електронско здравство, од почетокот на вакцинацијата, вакцинирани се вкупно 44.822 лица од ризичните категории население со бесплатни вакцини. Дополнителни 11.900 вакцини се набавени од страна на Центрите за јавно здравје, како вакцини за останатото население, кои чинат 800 денари. Со комерцијални вакцини, вакцинирани се над 4.300 лица.