Во Гостивар приведено лице кое продавало петарди на тезга, одземени се над 900 парчиња

Продавач на петарди завршил во гостиварската Полициска станица и се соочува со кривична пријава. Како што соопшти МВР, вчера (17 декември) околу 13 часот на ул.„Браќа Ѓиновски“ во Гостивар, полициски службеници, лишиле од слобода 34 годишен жител на селото Симница, кај кого биле пронајдени и одземени 920 парчиња разновидни пиротехнички средства, најмногу петарди. Лицето ги продавало петардите на тезга.

По целосно расчистување и документирање на случајот, против него ќе биде поднесена соодветна пријава.

Полицијата неодамна предупреди дека ќе ги засили контролите врз продажба и употреба на петарди и друга пиротехника, што вообичаено е присутна пред новогодишните празници. Казните се движат од 200 до 500 евра, но зависно од околностите и последиците може да се бара и кривична одговорност.