Во Гостивар промовирана книгата „Јас сум“ за животот на Елиза Абдија

Во Центарот за култура АСНОМ во Гостивар вчеравечер се одржа промоција на книгата „Јас сум“ од Вјолца Бафтиу Зулбеари, којашто е базирана на реалниот живот на младата гостиварка со оштетен вид, Елиза Абдија. Книгата го претставува животот на Елиза и носи порака дека лицата со оштетен вид и слепите лица се дел од нашето општество, ги покажува нивните предизвици и таленти, воедно посочувајќи како треба општеството да се однесува кон нив.

На промоцијата меѓу публиката во големата сала, беа и лица од јавниот живот, претставници од локалната самоуправа, од здружението на слепи и лица со оштетен вид Реалност и др.

„Благодарам што вечерва бевте дел од мојот сон, од текстот напишан пред неколку години за театарската претстава до објавувањето и промоцијата на книгата „Јас сум“. Се чувствувам привилегирано меѓу сите вас и ви благодарам што ги поддржувате моите културни активности.“, вели авторката.

На настанот свое обраќања имаше и Елиза, рецензентот на делото Агим Мустафаи, претседателот на Реалност, Џеват Фејзули, општинската претставничка Аслијан Снопче, поглаварот на ИВЗ, Шаќир Фетаху.

Издавањето на книгата е поддржано од Министерството за култура и гостиварскиот Центар за култура.