Во Гостивар промовирани книги и сликовници на Наташа Брезовска Богоевска

Гостиварци вечерва имаа можност да се запознаат со книжевниот опус на писателката Наташа Брезовска Богоевска, автор на книги за деца и за возрасни. Во Центарот за култура АСНОМ беа промовирани нејзините пет дела: Авантурите на желчето Тео, Шумски приказни, Приказна за две деца, Детства и Нишки до срцата.

Наташа е родена во Гостивар, а живее со семејството во Велес и за прв пат ги претстави своите книги пред гостиварската публика.

„Оваа промоција многу ми значи. Гостивар е град на моето детство, на мојата младост, овде ми се сите роднини, школските другари, навистина сум многу возбудена што ја имам приликата да ги промовирам книгите пред гостиварци“, изјави за Gostivarpress.mk писателката.

Публиката имаше можност да проследи неколку извадоци од книгите и да слушне осврти за творештвото на Брезовска Богоевска.

„Станува збор за специфична литература и од аспект на статусот во книжевноста, но и од аспект на функцијата што ја има во развојот на децата и младинците. Расказите на Брезовска Богоевска истовремено нудат и усвојување на соодветни културни вредности на живеење и однесување, но исто така и разбивање на наследените стереотипни претстави за другите луѓе, традиции, култура.“, кажа меѓу другото промоторката Билјана Дејановска, која се осврна на книгите и сликовниците од писателката за деца.

За збирката раскази „Нишки до срцата“ наменета за возрасната читателска публика, зборуваше промоторката Валентина Наумовска Пенопулу.

Наташа Брезовска Богоевска е родена 1971 година во Гостивар. Дипломирала Македонска книжевност и јужнословенски книжевности со македонски јазик на Филолошкиот факултет во Скопје. Претходно работела како наставник, а актуелно е вработена во библиотеката „Гоце Делчев“ во Велес. Пишува и сценарија и режира театарски претстави, со свои песни и раскази застапена е во заеднички збирки и антологии. Добитник е на повеќе награди за литература, меѓу кои прва награда за најдобра книга за деца-сликовница Едука Мак 2020 година.