Во Гостивар утре „Саем за вработување“ за автопатите на Коридорите 8 и 10Д

Конзорциумот „Бехтел и Енка“ кој ги гради Коридорите 8 и 10д организира „Саем за вработување“ кој ќе се одржи утре (16 август) во Гостивар. Информацијата преку социјалните мрежи ја пренесе, вицепремиерот и министер за политички систем и односи меѓу заедниците, Артан Груби.

„Градиме за новите генерации, модерна инфраструктура која го поврзува регионот со Европа и ја развива економијата на нашата земјата. Со задоволство ве информирам дека конзорциумот „Бехтел и Енка“ кој ги гради Коридорот 8 и 10д оваа недела го организира „Саемот за вработување“. Сите заинтересирани за работа ќе имаат можност да се запознаат со можностите што ги нуди овој конзорциум при изградбата на автопатските делници на Коридорите во следните пет години“, напиша Груби кој е координатор за изградба на коридорите.

„Саемот за вработување“ во Гостивар ќе се одржи во Центарот за вработување, а потоа ќе продолжи со презентација и во другите градови.