Во Гостивар вкупно се направени 40 тестови за корона, нови позитивни случаи нема

Состојбата со коронавирусот на гостиварското подрачје до денес 12 часот, останува непроменета. Не се регистрирани нови позитивни случаи, а се очекува единствената потврдена пациентка од Госитвар да се прогласи за излечена, со негативен контролен тест.

„До денес вкупно 40 лица се тестирани во Гостивар. Како што знаете една пациентка беше позитивна, други случаи нема. Според сите податоци, пациентката вечер ќе биде прогласена за излечена“, информираше градоначалникот Арбен Таравари.

Граѓаните во гостиварскиот регион, генерално ги почитуваат мерките и препораките за спречување на ширење на коронавирусот.

„Пикот на епидемијата допрва доаѓа и сега е потребно сите да останеме дисциплинирани и да ги следиме без исклучок мерките и препораките.“, нагласи вчера министерот за здравство, Венко Филипче.

Последните официјални податоци за Ковид 19, на државно ниво се од вчера и според нив вкупно има 285 заболени лица.